(13)蔡慧欣瞞父母拍拖喪喊求饒

lwl2007

港姐決賽明晚舉行，(10)李天縱被爆整容、陪酒及講大話；(13)蔡慧欣則因親熱照流出而壓力爆煲狂喊，更自爆講大話呃父母，兩大「咪神」齊變「大話精」！

本年度的港姐冠、亞、季將於明晚誕生，14位候選佳麗前晚到尖沙咀出席《港姐決戰前夕之傳聞對話》活動，平反連日來的種種是非，順道作最後拉票。她們攜同親友作「人格證人」，其中(9)麥美恩、(11)劉思希及「騰雞咪神」(13)蔡慧欣（Gemma）講親人時紛紛落淚。提到夜蒲攬仔激咀相外洩，向來「鵪鶉」的Gemma即壓力爆煲，邊標淚邊說：「我從來冇同父母講過拍拖，驚佢哋鬧！我要同佢哋Say Sorry！我有心呃佢哋，但冇心傷害。」她受訪時再次為講大話致歉，並承諾下次拍拖定必「如實稟報」，同樣爆喊的蔡母則自認保守：「個男仔係混血兒，我哋希望佢識番中國人。」

師姐教瞓覺減壓

至於同屬「咪神」的(10)李天縱（Lena）被讀者踢爆曾整容及陪酒，並指她於04年《環球小姐分區賽》明明落選，卻對外宣稱是「環球十佳選手」。對於整容疑雲，Lena強調因變瘦才令人生疑：「我喺北京賽區攞過『優秀選手獎』，可能係之前啲報道錯咗。（話你04年重105磅，但依家125磅，點解會瘦咗變靚？）嗰時係自己磅，大會冇統一量度。（陪酒陪客？）絕對冇，媽咪要求我十點前要返屋企！」

提到有佳麗壓力爆煲而喪喊，將卸任的應屆港姐季軍莊思明即向師妹教路，認為最佳減壓方法是瞓覺，她說：「綵排好忙，所以有時間就盡量去瞓覺，唔好諗獎項，愈諗愈大壓力。」

                                                                                                                                       
(13)蔡慧欣自爆呃父母與混血兒拍拖，在台上忍不住喪喊道歉。


                                                                                                              
蔡慧欣邊講邊淚流滿面，蔡媽媽即為愛女拭淚。


                                                                                                              
(11)劉思希愈講愈激動，最後要由友人安慰才平復心情。


                                                                                                              
媽咪特別從外地返港打氣，令I麥美恩感動落淚。


                                                                                                              
(5)朱晨麗殺入「最具冠軍相」五強，成為賽前熱門之一。


                                                                                                              
(10)李天縱自言減去Baby Fat才變瘦，否認曾整容。