鍾欣桐撐William護阿Sa

組合Twins本月17日舉行音樂會，鍾欣桐（阿嬌）昨日到排舞室綵排，阿Sa（蔡卓妍）因工作沒有出現，阿嬌的老師Miss杜炮製愛心湯來探班，阿嬌則送上寫真集答謝。綵排時阿嬌曾跳甩舞步，她表示因所有歌曲重新編舞，而日前她才開始排練。

提到在《國語力頒獎禮》因煙花爆破，導致William（陳偉霆）被轟只顧阿Sa而將她推開一事？阿嬌說：「當時啲煙花好誇張，嚇到我同阿Sa都縮後，而William係伸手幫我哋擋，冇掂到我哋，而啲火花就辣穿咗我件衫。」阿嬌認為William保護女朋友很正常。問到阿Sa是否留言罵歌迷？阿嬌說：「佢哋係講極唔明，是但啦！但我唔想我啲歌迷冇質素。」阿嬌指有些歌迷太偏激，只喜歡其中一人，但她和阿Sa是組合，不想歌迷只偏愛一個。