保怡風騷離巢 升價1,800萬人仔

lwl2007

無綫小生花旦拔足大逃亡，率先棄船的林保怡已北望神州搵人仔，人工增長五倍之餘，更有幸打入日韓市場。對於娘家正處水深火熱中，保怡一面指冇怨氣，一方面卻寄語舊同事：「做得唔開心咪走囉！」作為過來人，他的說話最中肯。

面對近日不少電視台發動挖角潮，用銀彈掏空無綫人力資源，醞釀不少小生及花旦欲離巢。其實林保怡於五月約滿娘家後已不再續約，連藝員合約也懶得簽，實行與無綫一刀兩斷！提起無綫這個成名地，保怡接受本報專訪時縱然說盡好話，但也不能否定「棄船」是個正確決定。

據知，保怡自離巢後已北上發展，原本已接拍一套內地劇集，但近日突然獲日本富士電視台與一間內地電視台邀拍劇，希望他夥拍日本視帝唐澤壽明及韓國型男吳智昊合作新劇《六個陌生人》，實行進軍日韓市場，他見機不可失即一口答應。仍未簽約的保怡，身價更是幾何級上，開到包薪1,800萬人民幣一年，兼且只須拍兩套劇集及廣告，每集酬金高達20至25萬人民幣，相比離開無綫時每集人工只得5萬元，升幅達五倍。另一間內地公司「華誼兄弟」亦對他虎視眈眈，有意捧他進軍大銀幕。

從未埋怨無綫

今時不同往日，保怡自言全靠好運：「我真係好好彩！因為有機會拍《六》劇，所以推咗另一套內地劇，欠佢哋一個人情，但佢哋方面好好，話可以等我拍完先再開！」他坦言離開娘家後從不擔心前途問題，還多謝無綫讓他參演《金枝慾孽》，「食老本」紅至當下：「當時人哋要唔要我真係未知之數，但我有信心，估唔到消息一出，內地好多公司即刻打畀我！我好明白，依家咁多工作，係因為當年拍《金》劇關係，所以我冇怨過無綫，大家都唔好怨。」

不過，保怡支持舊同事走得快好世界：「其實真係要諗吓點樣對自己好啲，先去做一個決定，做得唔開心咪走囉！大家成年人，簽咗約就唔好怨，冇人逼你簽！」問到無綫是否真的令人很多怨氣？他弦外之音地說：「我唔識交際，高層生日又冇去Party，又冇送禮，至多打電話講聲生日快樂，唉！係蝕底啲嘅！」

始終流過三色血，保怡最後苦口婆心說：「我對TVB有信心，知道係有挖角潮，好多編劇都走，但電視台百花齊放都係好事。」對於林保怡的忠告，馬浚偉表示銘記於心：「多謝佢嘅意見！（解約嘅事傾成點？）有關嘅高層一路認真處理緊，最後決定都需要時間磨合。（決定走？）公司明白我嘅提出，我喺公司咁多年都好有感情，會同公司開心去解決問題。」

另外，馬德鐘對於林保怡外闖而人工五級跳，亦戥對方高興。問到是否也決定向外闖？服務無綫十八年的他說：「樂易玲同我傾過，條件仲非常好，但始終要考慮好多嘢。」

                                                                                                                                         
林保怡離開無綫後北上發展，身價急升至千八萬人民幣！（資料圖片）


                                                                                                              
保怡拍畢《九江十二坊》後離巢，連「部頭約」也不願簽。