發哥無飯3星期速減5公斤

lwl2007

神級影帝周潤發為演好《建黨偉業》中袁世凱一角，神高神大的他竟連飯也不吃，只靠飲水，在21日內極速減掉5公斤肥肉，認真唔講得笑！


國際巨星周潤發雖已是神級演員，但對角色的尊重及專業，絕對值得演藝界後輩學習！發哥昨日到北京出席英皇電影《建黨偉業》記者會時，昂藏六尺的他自爆，為演好袁世凱一角，曾進行地獄式減肥，以近乎自殘形式對抗肥膏。

發哥去年接受本報專訪時曾表示，希望可以減至160磅，令自己上鏡時更加瀟灑；他日前與發嫂陳薈蓮出發往北京時透露，已成功收身達至目標磅數，認真Fit到漏油！

原來發哥為《建》片，竟用上原始方法減肥肉，他於記者會上笑說：「演袁世凱真係辛苦，特別為呢個角色減肥，我21日內特登唔食飯，只係飲水果腹，就減咗5公斤（約11磅），咁樣減肥演戲，真係要住得近醫院一啲比較划算！」當主持人讚他激似袁世凱時，心情勁靚的他即作狀板着臉，並笑說：「曾志偉先似，我諗揀我只係因為我夠高！」

片場變笑場

席間，幽默感爆燈的發哥再吐「苦水」，笑言與導演韓三平有仇：「我覺得真係同佢有仇，佢安排畀我嘅手下都有問題，趙本山、馮鞏佢哋日日喺片場講笑，搞到片場好似笑場咁，難怪我做大總統嗰陣咁亂七八糟！」他又「抱怨」導演褫奪他見「老婆」的權利：「我在喺片中有八個老婆，結果一個都冇見到！」韓三平即說：「你同佢哋有對手戲，不過嗰一場戲係袁世凱去世，所以你冇睇到。」

這邊廂發哥減肥演出，同片的董潔卻要增磅演活宋慶齡一角，她說：「演宋慶齡好有壓力，好想做得完美啲，所以一直努力增肥，但因為還有其他戲拍，惟有靠化妝同造型嘅改變，去表現呢個人物。」
                                                                                                                                         
幽默感十足的發哥，於記者會上「詐型」冇得見「老婆」。

                                                                                                              
發哥以弗爆身形演出袁世凱一角，零舍醒神。（資料圖片）

                                                                                                              
集逾百藝人演出的《建黨偉業》，昨日於北京舉行記者會。