超雲首認與陳山聰秘戀4個月

lwl2007

賭王何鴻燊千金何超雲昨日接受本報專訪時，首度開腔承認與無綫小生陳山聰拍拖，二人昨日由歐洲返港後，更於晚上在家與賭王食飯。在歐洲甜蜜蜜期間，超雲與山聰的感情與日俱增，難怪她甜絲絲大讚男友細心及溫柔，但仍未首肯與愛郎同房。

何家淑女向來戀愛大過天，身為百億賭業王國千金的何超雲，亦無懼世俗眼光，與比她年長12年的無綫小生陳山聰譜出戀曲！現年22歲的超雲歐遊多個月，連帶現年34歲的陳山聰亦人間蒸發，雖然超雲的感情生活不時在微博露端倪，但始終未有實牙實齒認定山聰的男友地位。不過，既然拍拖是一樁美事，又何需理會世俗眼光？超雲昨日接受本報專訪時，終把戀情公告天下！

記者：記　何超雲：雲記：

今次返香港係咪好緊張？

雲：係，我都諗唔到一落機就有記者，我同山聰都好狼狽，影我哋時，我哋冇拖手。

記：你同陳山聰一齊返香港？

雲：係。

記：過去幾個月，山聰係咪一直喺英國陪住你？

雲：唔係，只係大約三、四月時，山聰曾經嚟過英國探我，逗留咗五至六日，佢因為要做嘢而走先。

專程赴英陪飛

記：點解你咁耐唔返香港？

雲：我要忙做幾份關於Design嘅Paper。山聰知我今日返，佢因為唔放心我一個人返嚟，所以七日前特登過英國接我返嚟。

記：點解山聰返咗香港咁耐都冇公開露面？

雲：佢匿埋，因為好多負面新聞，暫時唔想曝光住。

記：你同陳山聰係咪拍拖？

雲：係，我同陳山聰拍拖。

記：你同陳山聰幾時開始拍拖？

雲：大約四個月前開始。

記：你喜歡陳山聰乜嘢？

雲：（語調甜絲絲）佢好直、好細心、好溫柔，同埋好錫我。

未達同房關係

山聰離過婚，又並非無綫一線小生，與超雲的地位可謂天壤之別，如今超雲揮一揮魔術棒，令山聰頓變王子！儘管兩口子感情一日千里，但在這段甜蜜蜜的歐遊日子，二人的關係究竟有多親密？

記：恕我直言，陳山聰呢七日喺英國，係咪同你住埋同一間房？

雲：唔係，我有個女朋友同我一間房，山聰住喺隔籬房，呢七日我要繼續為Paper搜集資料之外，我同山聰都有一齊行吓街、食吓嘢、遊覽吓！

記：你哋拍拖以來，係咪仲未發展到同房嘅關係？

雲：我哋未去到呢個階段。

與柏豪僅朋友

找到Mr. Right的超雲，談及與山聰的一段情亦絲毫沒有吞吐，更何況早前與周柏豪這段煲水緋聞？有就有、冇就冇！她一句到尾否認有關傳聞。

記：之前傳周柏豪同你拍拖？

雲：大家只係朋友關係。

記：正如柏豪所講，依家係朋友，將來亦係朋友，唔準備去改變彼此關係？

雲：係！大家都無意改變！

記：有咁多是非緋聞圍繞你同柏豪，你同柏豪有冇傾過呢啲新聞？

雲：佢冇打嚟傾過，冇傾過電話。

何超雲Profile

英文名：Florinda

年　齡：22歲

背　景：賭王何鴻燊三房長女，母親是三太陳婉珍。去年，賭王將價值逾百億港元的澳門漁人碼頭送予三太及超雲。

學　歷：英國完成工商管理課程，最近再到英國進修設計。

陳山聰Profile

英文名：Joel

年　齡：34歲

背　景：出身小康之家，父親被指在澳門做紙品生意，哥哥則做運輸業，近年家族進軍飲食業及開設按摩中心，並在澳門黑沙購入一楝四層高獨立別墅。

職　業：17歲出道做歌手，後因星途一般而轉行，00年加入無綫當藝人，近年代表作有劇集《洪武三十二》，而最近參與的劇集則是《我的如意狼君》。

                                                                                                                                            
與男友雙雙返港的超雲，接受本報專訪時首度承認與山聰蜜運中！