泰國 曼谷

山道♂飄移

黑夜豪放　索女露臍打擂台

新鮮滾熱辣開放的 BTS延線，從 OnNut起新增5個車站。最初以為新支線有新嘢玩有新嘢食，誰知酒店職員話延線只連接新樓盤，附近無啖好食。不過，新延線非一無是處，去年執笠的SuanLum夜市以 Siam Paradise名稱捲土重來，誓要做得比以前更大更舒服，開業半年就有1,300間商舖加入。

鬼佬打泰拳　膝撞爆笑


■開頭以為他們做戲，後來見到傷痕才知是「真人快打」。

SiamParadise驟眼看最不同的是門口增設酒吧區專門提供各類啤酒小食，而舞台亦搬到門前，由不同歌手接力上台表演，搭BTS一定睇到！雖然小食款式不比以前多，但場地擺放戶外木家具，舒適度遠勝從前的白膠椅。而以前經常找不到的泰拳擂台亦正式落戶夜市，星期三及星期六晚上7點起市集中庭位置便會築起擂台打泰拳，不過並非泰仔打泰拳，而是鬼佬打泰拳，由於他們的柔軟度不足，膝撞時效果爆笑。另外，還有女子組比賽，拳手個個省鏡。雖然白紙黑字寫到明話要收入場費，但唔買飛都可以行近擂台睇，免費就可以近距離睇泰拳，[!9FE9]企都抵！


■台上由晚上 11點至凌晨 2點不停有勁歌熱舞，全場 high爆！


■剛剛取得壓倒性勝利的 Youna，一見鏡頭就自動自覺擺甫士。

a. Siam Paradise
地址： 2430 Sukhumvit Road, Prakhanong
開放時間：下午 6時至凌晨 12時
交通：從 BTS Udom Suk站下車沿 Sukhumvit Road步行 10分鐘

人狗齊裝身


■猩猩版福祿壽各有不同動作，一套 3隻約$78。

點解件衫咁細件嘅？原來係畀狗仔着㗎。首次在市集開店的姊妹Honey及Phu，覺得市場無太多狗仔衫選擇，來來去去只得幾個品牌，索性自己開舖做設計，製作不同狗仔衣飾。如每月新款的狗仔頸圈，除太陽花外還有領帶可供選擇，可恨無煲呔款；一身拳手打扮的狗仔衫約賣$65。除衫仔外，店舖還有好多狗仔精品發售，例如狗頭造型的杯、瓶中狗電話繩同磁石貼等，還會跟其他設計師合作製作不少 tee款，主人想同狗仔襯埋一套都仲得！


■公雞造型擺設約$40


■貓頭杯約$25


■狗仔衫款式多樣，要揀心水貨品都要好幾個鐘。


■全店用上木地板及其他裝飾，切合家的感覺。


■老闆與其他本地設計師合作推出 tee款，每件約$16。
                  

■畀狗仔着的泰國傳統服，左約$65，右約$84。
                                                
PET TALK
地址： Zone C Soi 19-20,Room 287及 312,Siam Paradise Night Bazaar
營業時間：下午 5時至凌晨 12時

專收 60's美國古董

古董有人當垃圾，亦有人當係寶，至少WORKSHOP老闆Chanchai認為，古董是記載歷史的橋樑。別看他年紀輕輕，原來已是半個收藏家，古董多到要開店售賣。小店玻璃櫥窗陳設着不同古董，店內佈局有如美國西部雜貨店一樣，收視率相當高。老闆話他鍾意美國文化，所以專搵當地六十年代有關的小擺設，有時更四圍搵二手古董，所以店內售賣的古董種類由開瓶器至扭蛋都有，其中幾個有半世紀歷史的鐵皮水壺，因貨主惜貨，故Steve交涉近半年才成功取得貨品，所以暫時不作售賣，看看有否真心買家才再決定。


■老闆年紀輕輕就已經鍾意收藏古董。


■這些就是老闆落足牙力跟別人買來的鐵罐，非賣品。


■啤酒品牌煙灰盅，約$45。


■泰版益力多膠樽，約$50。

WORKSHOP
地址： Shop B054, Siam Paradise Night Bazaar
營業時間：下午 4時至晚上 11時

每月一款自家 Tee


■另一老闆 Noon，不斷游說小記買他身上的 tee，約$65。

Sure主要賣自家設計，其 tee所採用的棉料比同類型為好。講得一口流利英語的老闆Cheewit同哥哥二人開設Sure，由他負責設計，哥哥負責營運，旺到連Chatuchat都有分店，現時他們維持每月推出一款新圖案tee，鞋及袋款則不定期更新以吸引客人。不過他承認， SiamParadise開業畢竟半年，面積較以前大三分一，人流不能一下子追上 SuanLum，但因BTS開通以後，應可吸引更多東主將店舖搬到這邊，屆時便有更多不同種類的貨品。


■帆布袋質料挺身，而且手工精細，不過價錢不便宜，約$312。


■格仔 pattern帆布鞋，約$235。

Sure
地址： Shop C066, Siam Paradise Night Bazaar
營業時間：下午 4時至凌晨 12時

餓靚芝 Van酸汁麪包粒

行到餓但又唔想食炒飯炒麪咁 heavy？ Siam Paradise Night Bazaar門口就泊住部sharp爆粉紅色福士「餓靚芝」van，遠一遠都已經聞van仔飄出的麪包香。行埋一睇，發現單單是多士都已有十幾款，一於叫碟原味奶油多醫肚。店員一邊在車尾焗麪包一邊同客人傾偈，但麪包又出奇地唔燶至犀利。其他人大多叫麪包粒配酸汁一齊share食，單靠酸汁已令麪包惹味非常。另一必叫係奶茶，只因它是用煉奶冲的奶茶，小記試過覺得士多啤梨味較濃，就算食完多士都會嗒到果味。


■由於幫襯的人太多，店員做到無停手。


■一大班人一邊食消夜一邊睇台上表演，實是人生樂事。


■這架 Siam Paradise門前的粉紅餓靚芝 van勁搶眼。


■秘製 麪包粒客人落酸汁，約$8。
                                                
Love Milk
地址： Siam Paradise Night Bazaar門口
營業時間：下午 2時至凌晨 12時

Disco睇騷唔願走


■只要你夠主動，識到靚女絕非難事。

話明要感受曼谷夜生活，又點少得去當地人最愛的 HollywoodAwards，呢間幾乎是全曼谷最大的disco，樓高兩層，幾千人入去都唔覺逼。入去前先要「科水」，$105包 2杯酒精飲品，每晚11點後都有超少布女歌手一邊唱 LadyGaga一邊跳辣身舞，又有 catwalkshow，睇到大家血脈沸騰。雖然場內鬼妹不多，但有當地model補數，只要夠主動，即使唔識泰文都好快跟她們打成一片，去到凌晨2點關門時，大家都不捨得走，仲話要約出來飲飲食食，就係咁先好玩。


■ Hollywood Awards是曼谷最大的夜場之一，凌晨 12點仍有人排隊入場。


■場內女歌手衣着性感，仲激嘅都有。

b. Hollywood Awards
地址： 72/1 Ratchadapisek 8, Huay Kwong, Bangkok
開放時間：晚上 8時至凌晨 2時
前往方法：乘 MRT到 Cultural Centre下車行 5分鐘（中國大使館對面）



泰國人一向尊崇泰王普密蓬，經常出紀念鈔票，如 2000年推出的 50銖鈔票，便是紀念泰王和王后詩麗吉金婚 50周年，鈔票背後是王后在婚禮期間接受王后祖母的祝福。

Travel Memo



持特區護照及 BNO護照均免簽證。
泰國駐港領事館： 2521 6481
永安旅遊 4日 3夜自遊行套票，包泰國東方航空來回機票，入住 3星級 FXHotel Makkasan或住 Banyan Tree及半島酒店等，套票價$1,699起。
查詢： 29216288

220V，兩扁腳插座
1港元約兌 3.84泰銖（文中價錢已折算港元）
下周天晴， 24-34℃






■女子泰拳着重技術多於力量，每場基本上都是勢均力敵，咁先好玩！

山道♂飄移

日間樸實　水上市場尋大頭妹

蒲完夜場後，一早醒來，如果你還精神奕奕大把貨，係時候周圍去體驗泰國人生活。去邊？當然好似蔡瀾嘆世界咁去市場了解民生啦，不過在曼谷不是去街市，而是到水上市場。

坐艇遊水上市集

去咗曼谷好幾次，市中心餐廳大多數 10點幾才開門，咁早起身咪無事做？非也，泰國人一早就起身做生意，例如早上 9時半已開門做生意的 KhlongLadMayom水上市場，原本是農民種植椰子及蔬菜的地方，運河就方便他們進行交收，之後陸續有商戶進駐售賣熟食及小吃。海鮮當然是最受歡迎食物，當地人必食的鹽燒魚同魷魚，加埋少少辣的香茅汁，好惹味呀！此外，雪條亦是必食之物，混合煉奶及果汁後甜味十足。


■少少辣的香茅汁約$3。


■手繪圖案 tee，懷疑洗完會甩色，約$41。

泰版 Chocolate Rain現身

亦有商戶進駐河兩岸售賣工藝品，好多還是當地特有產物，如泰版 Chocolate Rain布袋，頭大身細的公仔造型可愛，標準 size的 totebag售$32。由於運河仍擔當濕貨交收角色，所以不停有運送水果、海鮮的船隻靠岸，因此有老闆索性在岸邊開熟食檔。不過高溫下最得人鍾意當然是降溫的椰青同雪糕啦。


■勁似 Chocolate Rain手畫布袋，$32。


■高溫下飲番支椰青解渴，約$6。


■未到 11點就已經人山人海，食飯時間要搵個位都難。


■出入民宿就是要靠艇仔駁腳，唔算方便。

c.Khlong Lat Mayom Floating Market
地址： Bang Lamad Road, Taling Chan,Thonburi
開放時間：早上 9時至下午 4時
交通：乘 146號巴士往 Kanchanaphisek路轉乘的士往 Bang RamatRoad

尋隱世部屋


■民宿附近又有小店專賣香蕉品，一包十幾粒約$6。

這幾幢民宿名 Bansawangchan，老闆Taveesak除開放自己寓所讓人參觀外，仲安排其餘親戚的住宅出租，每間屋間隔不同，有的擺放吊床吊扇營造泰式風情，有的在客廳擺設巨型雕塑，有的充滿北歐設計feel。民宿又會售賣手作仔如橡筋槍，另有小食及飲品，全部都是自家製無添加。可惜民宿位於河邊，幾乎無車可抵達，只可靠騎電單車或坐船，但聽船家講每艘快艇單程包艇價要$200，且河水臭過城門河，真是有辣有唔辣。


■難得去到型格木屋，連日本記者都大叫 kawaii呢！


■話明係隱世民宿，當然要遮遮掩掩才夠神秘。


■民宿除招呼客人入住外，還會賣紀念品，豬仔手工擺設，約$7。


■民宿有大中細三個型號橡筋槍賣，售$9至$39。

d.Bansawangchan
地址： 65/1 Mu5, Bangramat Talingchan, Bangkok
收費：3人房每晚約$260
交通：從 Khlong Lat Mayom Floating Market坐 30分鐘船前往 Bansawang再步行5分鐘


■ Khlong Lat Mayom水上市場沿運河兩邊而建。