祖兒領軍睇騷劈酒擾民

【今日我至黑】祖兒前晚同阿Sa睇BIGBANG，個場已經夠黑，祖兒仲要全程戴黑超，睇嚟阿Sa要好好照顧佢。容祖兒、蔡卓妍、鍾舒漫、周秀娜和文詠珊等，前晚在機場亞洲博覽館欣賞韓國人氣組合BIGBANG的尾場演唱會。有在場人士報料指以祖兒為首的部份藝人及其友人，將台下變成私人派對，不但帶香檳及紅酒入內大呼小叫，祖兒全程戴着墨鏡，鍾舒漫更被指跟身邊女伴咀嘴，似乎無心欣賞表演。

韓國人氣組合BIGBANG前晚在機場的亞洲博覽館舉行尾場演唱會，一班藝人鄧紫棋（G.E.M.）、薛凱琪、方大同、文詠珊、周秀娜及一班以容祖兒為首的英皇藝人鍾舒漫及蔡卓妍（阿Sa）都慕名到場支持。他們大都買了最貴的企位門票，不過有跟這班藝人同場看騷的讀者陳小姐，昨日投訴部份藝人將演唱會當成自己的私人派對，不但飲酒作樂，更無視其他觀眾。

■鍾舒漫（左）入場時很清醒，但有指她在場內跟女友人咀嘴。鍾舒漫醉咀女友

爆料人陳小姐昨日接受電話訪問時說：「我同佢哋都係買咗A1區嘅企位，最先見到阿Sa同班好似係助手定係dancer嘅朋友一齊，當時佢哋已經開始飲類似酒嘅嘢，到後來祖兒嚟埋佢哋開始好high，有香檳、紅酒，仲同祖兒講『乾杯』，好似自己搞私人party咁，只有阿Sa一直都只係睇表演冇參加。」陳小姐指這班藝人站在後排不時大呼小叫，跟鍾舒漫一起的女友人更撞到她，她說：「容祖兒全程戴住墨鏡睇表演，鍾舒漫仲同佢飲醉嘅女性朋友錫面同錫嘴，佢朋友玩到癲晒，仲撞咗埋嚟，又搞到成地紅酒樽、香檳樽，又整濕地下，連我對鞋都俾佢整濕。其實好多藝人好似G.E.M.、阿Sa都真係睇表演，唔明點解係佢哋好似開party咁。」她指鍾舒漫跟女友人因為醉酒，所以中場已離開。

祖兒：飲咗一啖

祖兒昨日透過經理人霍汶希回應：「自己只係飲咗一啖啤酒，四個人share一罐啤酒，我平時都唔飲酒㗎，嗰晚本來我係坐位，阿Sa拉咗我過去企位一齊睇騷，我聽到音樂就natural high，完全冇迷，神志好清醒。」此外，祖兒為一連鎖電器店拍攝新一輯宣傳廣告，她以不同造型現身，包括坐上一米闊的巨型紅唇盪鞦韆。