林欣彤考貨Van Pass

小魔女

林欣彤（Mag）成功過關考牌做「貨Van女車神」，並強迫從事運輸的爸爸退休，誓要做孝順女養起頭家。雖然Mag否認被緋聞男友羅孝勇照顧而另築愛巢，但承認上過羅家兼見過「老爺、奶奶」，戀情逐漸浮面！
有「小巨肺」之稱的林欣彤昨日在香港駕駛學院考貨Van車牌試，最終成功1 Take Pass，原來考試期間Mag曾被天雨殺個措手不及：「考緊試時突然落雨，又要顧埋個水撥，加上考官好Cool，搞到我好緊張。」車牌到手後，她最想嫲嫲成為第一位乘客，問到緋聞男友羅孝勇呢？她說：「睇吓佢敢唔敢啦！」
Keep住食抗抑鬱藥
一心想做車主的Mag更希望強迫從事運輸的爸爸退休：「我驚佢辛苦，我都攤大手板廿年，依家應該到佢攤大手板問我攞錢，我有能力養起頭家。」曾患上抑鬱的她表示仍Keep住食抗抑鬱藥：「有病當然要食藥啦！我選擇未好番都出番嚟做嘢，係因為想證明畀人知孭住個病都可以發放正能量，亦知道身邊有人愛我！」
對於有報道指羅孝勇為令她可專心養病，「揼本」租住紅磡豪宅過二人世界，搬離何文田「羅家」，Mag對此說：「我冇搬去紅磡。（仲住喺何文田？）佢係住何文田，我住大埔，真係冇同居。」提到有指「老爺、奶奶」不滿她經常哭訴？她大耍太極說：「我隻狗先吸收得最多我嘅『淚』氣。」但她承認曾上羅家作客，並見過對方父母：「之前有上過佢屋企玩，經理人都喺度。（羅父母唔鍾意你？）應該冇啩！你幫我問吓！」

Mag無懼天雨，順利考獲車牌。

考車牌1 Take Pass的Mag，甚有滿足感。