對付男友沉迷玩樂的4大方法！

藍月亮

今時今日嘅男生，面對太多誘惑，可以沉迷嘅項目太多，打機、賭波、上網……我哋唔係要完全阻止佢哋做呢啲事，只不過如果過度沉迷，就好可能會影響你同佢嘅關係。要與之抗衡，並唔需要螳臂擋車，因為我哋有女生天生嘅小宇宙。

• 男生唔怕女生惡，但最受唔住可愛嘅女生，你何苦要辛苦自己歇斯底里地去阻止佢，你可以輕輕鬆鬆地嗲佢：「Babe，你係咪真係愛我？」「梗係啦！」你就要立即打蛇隨棍上，語氣再嗲啲：「咁點解你掛住打機都唔過嚟錫吓我嘅？」
• 男生有時好似小朋友，要「訓練」佢，可以用「條件交換法」，例如如果佢星期五要同兄弟飲嘢，咁佢星期六就唔可以打機，要陪你睇戲。亦可以用「延遲滿足」法，即係佢搭搭吓地鐵想拎部電話出嚟打機，你就要求佢幫你諗吓個project點做，諗完先再玩。咁樣有助幫佢戒除「機癮」。
• 男生沉迷某啲事情，好多時都係三分鐘熱度，你大可發掘一啲新嘅「沉迷」玩意，例如一齊報班學wakeboard，令佢成個夏天都周身唔得閒加攰到爆，慢慢地佢就會忘記「舊愛」。
• 以其人之道還治其人之身，你都「沉迷」喺一件事情上，例如煲韓劇，令佢好難先約到你，大家一齊時，你淨係掛住韓劇劇情，又霸住部iPad煲碟。佢投訴時，就話佢知，其實佢做嘅事亦同出一轍。不過用呢個方法，你就要有無比嘅耐性了！