返回列表 發帖

春天食葱 有益健康

春天食葱  有益健康

    洋葱同大葱屬同類食物,洋葱營養價值高,喺西方被譽為“菜中皇后”。到底洋葱有幾好呢?洋葱最出名一定係殺菌,仲含有膳食纖維、維生素C及礦物質等。大葱就係我哋中國北方人最愛,平時拎條大葱生食十分普遍,夠晒有營養,炒菜時加葱,仲可以增添餸菜嘅香味。
    講起葱嘅食療,葱能發汗、促進消化、健胃防感冒、降血脂等,而且葱係最能夠防止骨質流失嘅蔬菜,認真睇唔出!今次就等老周教大家炒個京葱炒肉片。準備材料如下:適量肉片、鹽、糖、生粉、京葱一棵、薑蒜茸、蠔油。首先將肉片用鹽、生粉醃好,然後將京葱去頭去尾,撕去表層較老部分後,斜切成厚片。肉片落油鍋炒熟,加上薑葱蒜、蠔油、糖、生粉炒完就可以上碟。特別一提,京葱唔使炒太熟,以免降低營養。
    大家喺屋企可以試吓炒呢道餸,香噴噴食過返尋味!

返回列表